អាមេរិក៖ សហរដ្ឋអាមេរិក បានចុះបញ្ជីប្រើប្រាស់វ៉ាក់សាំងចំនួន ៣៥១,៤០០,៩៣០ដូសហើយ សម្រាប់យុទ្ធនាការផ្តល់វ៉ាក់សាំងជូនប្រជាពលរដ្ឋ ខណៈទិន្នន័យដែលផ្តល់ដោយនាយកដ្ឋានប្រយុទ្ធនឹងជំងឺឆ្លង (CDC) របស់សហរដ្ឋអាមេរិកបានឱ្យដឹងថា បច្ចុប្បន្ននេះវ៉ាក់សាំងដែលសហរដ្ឋអាមេរិកកំពុងមាន មានចំនួនជាង ៤០៧,៥លានដូស។

គួរបញ្ជាក់ថា ទិន្នន័យដែលទទួលបានពី CDC បានឱ្យដឹងថា គិតត្រឹមថ្ងៃអាទិត្យ ទី០៨ ខែសីហាម្សិលមិញនេះ មានប្រជាជនអាមេរិកចំនួន ១៩៤,៨៦៦,៧៣៨នាក់ បានទទួលនូវវ៉ាក់សាំងដូសទី១ រួចរាល់ ខណៈប្រជាជនដែលទទួលបានវ៉ាក់សាំងពេញលេញរួចរាល់មានចំនួនរហូតដល់ ១៦៦,៤៧៧,៤៨១នាក់ ដែលស្មើនឹងជាង ៥០ភាគរយនៃចំនួនប្រជាជនអាមេរិកសរុបដែលមានប្រមាណ ៣៣៣លាននាក់។

ចំនួនខាងលើនេះ​ CDC បានរាប់បញ្ចូលទាំងប្រជាពលរដ្ឋដែលបានទទួលវ៉ាក់សាំង ២ដូសរបស់ក្រុមហ៊ុន Moderna និង Pfizer ក៏ដូចជាវ៉ាក់សាំងដែលតម្រូវឱ្យទទួលត្រឹមមួយដូសគឺ Jonhson & Jonhson។ 

គួរបញ្ជាក់ថា អាមេរិកគឺជាប្រទេសឈរលើគេដែលមានអ្នកឆ្លង និងអ្នកស្លាប់ច្រើនជាងគេបង្អស់ ដោយយោងតាមគេហទំព័រ Worldometer បានរាយការណ៍ថា ចំនួនអ្នកឆ្លងនៅសហរដ្ឋអាមេរិកមានជាង ៣៦,៥លាននាក់ និងអ្នកស្លាប់មានជាង ៦៦ម៉ឺន ៣ពាន់នាក់៕